Num 24 | NdeIBE | STEP | Kwathi uBhalamu esebonile ukuthi kuyamthokozisa uJehova ukubusisa u-Israyeli, kasadinganga njalo imilingo njengakuqala, kodwa waphenduka wakhangela enkangala.

Numbers 24

1 Kwathi uBhalamu esebonile ukuthi kuyamthokozisa uJehova ukubusisa u-Israyeli, kasadinganga njalo imilingo njengakuqala, kodwa waphenduka wakhangela enkangala. 2 Kwathi uBhalamu ekhangela wabona u-Israyeli emise izihonqo zakhe ngokwezizwe zakhe, uMoya kaNkulunkulu wehlela phezu kwakhe 3 wasesitsho isambulelo sakhe: “Isambulelo sikaBhalamu indodana kaBhewori, isambulelo salowo omehlo akhe abonisisa kuhle,

4 isambulelo salowo ozwa amazwi kaNkulunkulu, lowo obona umbono ovela kuMninimandla wonke, lowo owela phansi ngokuzehlisa, njalo omehlo akhe avulekile:

5 “Aze aba mahle amathente akho, O Jakhobe, izindawo zakho zokuhlala, O Israyeli!

6 “Njengezigodi zisabalele, njengezivande zisekele umfula, sanhlaba ehlanyelwe nguJehova njengezihlahla zomsedari ezingasemanzini.

7 “Amanzi azageleza emigqonyeni yabo; inhlanyelo yabo ibe semanzini amanengi. “Inkosi yabo izakuba nkulu kulo-Agagi; umbuso wabo uzakuba ngophakemeyo.

8 “UNkulunkulu wabakhupha eGibhithe; balamandla anjengawenyathi. Bayatshwabadela izizwe eziyizitha njalo bephule amathambo azo abe yizicucu; ngemitshoko yabo babagwaze.

9 Njengesilwane bayaqutha bacathame phansi njengesilwanekazi – ngubani olesibindi sokubavusa na? “Akuthi labo abakubusisayo babusiswe njalo lalabo abakuqalekisayo baqalekiswe!”

10 Ngakho uBhalaki wamthukuthelela kakhulu uBhalamu. Watshaya izandla zakhe wathi, “Ngikubizile ukuthi uzengiqalekisela izitha zami, kodwa wena usubabusise okwamahlandla la amathathu. 11 Wohle usuke nje khathesi ubuyele kini! Ngithe ngizakupha umvuzo omuhle kakhulu, pho-ke uJehova usekuvimbele ukwamukeliswa umvuzo.”

12 UBhalamu wamphendula uBhalaki wathi, “Kanti kangizitshelanga yini izithunywa zakho owazithuma kimi ukuthi, 13 ‘Loba uBhalaki enganginika isigodlo sakhe sigcwele isiliva legolide, akulalutho lolulodwa ebengizalwenza ngokwentando yami, okuhle kumbe okubi, okuphambene lomlayo kaJehova – kufanele ngitsho lokho kuphela uJehova akutshoyo na?

14 Khathesi sengibuyela ebantwini bakithi, kodwa woza, ngikuxwayise ukuthi kuyini okuzakwenziwa ngabantu laba ebantwini bakho ezinsukwini ezilandelayo.”

Isambulo sesine sikaBhalamu

15 Ngakho uBhalamu wasesitsho isambulelo sakhe: “Isambulelo sikaBhalamu indodana kaBhewori, isambulelo salowo omehlo akhe abonisisa kuhle,

16 isambulelo salowo olalela ezwe amazwi kaNkulunkulu, ololwazi oluvela koPhezukonke, obona umbono ovela kuMninimandla wonke, owela phansi ngokuzehlisa, njalo omehlo akhe avulekile:

17 Ngiyambona, kodwa hatshi khathesi; ngiyambona, kodwa kungesikho eduze. Inkanyezi izaphuma ivela kuJakhobe; intonga yobukhosi izaphakama ivela ku-Israyeli. Uzacobodisa amabunzi kaMowabi, izinkakhayi zamadodana wonke kaShethi.

18 U-Edomi uzanqotshwa; uSeyiri, oyisitha sakhe, uzanqotshwa, kodwa u-Israyeli uzakhula ngokuba lamandla.

19 Umbusi uzavela kuJakhobe njalo uzabhubhisa abaseleyo balelodolobho.”

Isambulelo sokucina sikaBhalamu

20 Ngakho uBhalamu wabona u-Amaleki wasesitsho isambulelo sakhe: “U-Amaleki wayengowokuqala ezizweni, kodwa ekucineni uzakuba lunxiwa.”

21 Ngakho wasebona amaKheni wasesitsho isambulelo sakhe njalo: “Indawo yakho yokuhlala ivikelekile, isidleke sakho sakhelwe edwaleni;

22 kanti-ke lina maKheni lizabhujiswa ekuthunjweni ngu-Ashuri.”

23 Ngakho wasitsho isambulelo sakhe: “Kambe ngubani ongaphila nxa uNkulunkulu esenza lokhu na?

24 Imikhumbi izakuza ivela ekhunjini lwaseKhithimu; bazakwehlula u-Ashuri kanye lo-Ebha, kodwa laba bazachithwa babe ngamanxiwa.”

25 Ngakho uBhalamu wasukuma wasebuyela kibo kwathi uBhalaki wahamba ngeyakhe indlela.